Am Fritig Abig, 14. Juni, händ d'Moguser no ä zümpftigi Prob anägleit und aschlüssend sind di verschidänä Inschtrumänt id'Auto igladä wordä. So sind mir no am glichä Abig, so als Mogus-Karavanä, mit öppe foif Auto uf das Volketswil usäghötterlät. Det hät ois, ufgrund vom ach-so-schönä-Summerwätter und senza Klimaalag, es extrem überhitzts Sudio erwarted. Mir händ ois sofort chli igrichtäd und ois "schaurig" uf dä nächschti Tag gfreut. Dä Tag dur isches ja amig nochli wärmer...

Am Samschtig hät dä Hug törfe dä Uftakt mache. Er hät richtiggehend mit em Pilot, (wo ja schiins doch keinä gsi isch..) kämpft. Unterdessä hät sich dä Rescht vo dä Moguser anderswiitig d'Ziit vertribä. Schuäl, idä Hängematte höckle, Läse, bidä Ufnahmä zulosä und kritisiäre, Sünäle, Volleyball spilä.... und da sell no einä säge, Studioufnahmä seigäd en Chrampf! Okay, ich dänk, dä Roger häts nid liächt gha mit eus. Vor allem: Sauna ahoi!

Später isch dä Büechi mit sim Piano ad'Reihä cho und nochli später dä Gempi. Diä zwei händ sogar nochli meh törfe schwitze...

Mit denä drü Moguser und nanig ganz dä Helfti vo dä Liäder, isch dä erschti Studiotag bereits verbi gsi.

Miteme Sprung in See und ere feinä Pizza händ mir dä Abig usklingä lah und sind dänn bald mal go pfusä.

Am Sunntig hät dä Gempi nomal gschwind es paar Tön törfä spilä. Nacher hät äntli dä Guggi sini geilä Soli chönä ufnäh. Aschlüssend isch dä Blöch ad'Reihä cho. Au ohni sin Mikrofonständer hät er diä viär Stuck super gsungä. Ganz zum Schluss, wos verusse scho fascht wider dunkel wordä isch, han ich au no gschwind mini Gitarrä und min Gsang törfe ufnäh.

Unterdessä sind eusi Utensiliä bereits wider igladä und en Teil au scho hei gfahrä wordä.

Wo mir eus uf dä Heiwäg gmacht händ, sind viär Mogus-Songs, zwar komplett, jedoch no sehr untonhaft, im Chaschtä gsi. Für dä Roger hät dänn di gross Arbet erscht agfangä.

S’Resultat: Viär Liäder für eusi Demo-CD!

Suff - Vergange - Jungfrau - Gang