Dä Aapfiff fürs Heimspiel i dä "Laguna"-Bar vom Restaurant Landenberg in Turbenthal hät es quiitschends Mikrophon gmacht. D'Bar isch zumä Hallestadion mutiert und en Huufe Mogus-Fans hät sich uf di vorderschtä Plätz drängt. Obwohl mä mues sägä, dass dä Sänger da dra nöd ganz unschuldig gsi isch (Kommunikationsproblem?)... Dä Meinrad am Mischpult hät dänn di ganz Schar i di hindere Reihä zrugg gholt. Nei, natürli nöd ohni Grund und au nöd allzu wiit hindere: d'Mikrophon sind no chli menscheschüüch (viellicht well MOGUS eifach zwenig Konzert git...) und händ bi dem grosse Adrang a Publikum (Fründä, Familieaghörigi, Fans mit Bänd-T-Shirts) ängschtlich agfangä idä höchschte Tön z'quiitschä !!!

Aber sie händ sich schnell a die Mänschemängi gwöhnt und s'Konzert isch en Schmaus für d'Ohrä und d'Auge wordä ! D'Gsamtspielziit isch leider viel zschnell vorbii gsi. Di herrliche Melodie und ussagechräftigä Text het s'Publikum no lang wellä gnüssä. Mit funkelnde glitzernde Wunderchärzli händs ihri Begeischterig understriche.

Dä Sieg isch dä iheimischä Band MOGUS uf sicher gsi. En riesägrossä Applaus !!!